انا و الحياة

بيقولك الاسعار هتغلى
بيقولك المدارس هتتأخر شهر السنة دي عشان......
سمعت ان هيلغوا قطار ابى قير و هيعملوا مترو انفاق ...و خلاص اتفقوا مع الشركة اللى هتنفذ
بيقولوا ... مات و اللى بنشوفه دة وش متركب
كتير اوى بنسمع كلمة بيقولك...سمعت ...بيقولوا ...و حاجات شبه كدة ...
مرة واحد لسة هيقوللى ''بيقولك '' قولتله
'' مين دة اللى بيقولى و لو عايز يقولى يجى فى وشى و يقول !!!'' ... طبعا سخرية
مش انتم معايا برضه ان مينفعش الكلام يبقى كدة ...
مرة طلعت اشاعة و سبتها تلف و جه واحد يقولى : " تصدق دول بيقولوا كذا ؟ "
قلتله : تصدق انى انا اللى بيقولوا !!!
حاجة غريبة جدا الناس عندها استعداد تقبل اى كلام من غير ما تحاول تسأل او تستوضح الموضوع و مش بس كدة ممكن يضيف من عنده زى اللى يعرف انهم اتفقوا مع الشركة اللى هتنفذ !!! حب يضيف بقى مهو كله بيقول اشمعنا هو !...
و يا ريت يسكت لا ازاى ينشرها يمين و شمال
وكل واحد يحاول يستنتج طالما بيقولوا المدارس هتتأخر شهر يبقى اكيد فيه سبب خلاهم يعملوا كدة يروح هو بقى ابو الفاهمين مطلع السبب من فم الاسد و ضيفوه على الجملة اللى هما اصلاً قالوها !
هما مين مش عارف .
بمناسبة مش عارف جربت تسأل حد على عنوان شارع حتى لو كان وهمى ... استحالة حد يقولك مش عارف
مرة واحد سأل على شارع و اخترع اى اسم و الناس تخترع اجابات و هو يفطس من الضحك ...
جربت تسأل بابا على حاجة و قال معرفش جربت تسأل مدرس او دكتور جامعة و قال معرفش مقرأتش الموضوع ده بتوسع ..
جربت تسأل ... وقال معرفش !
مع ان المثل بيقولك : من قال لا اعرف فقد افتى
معلش الطبع يغلب و قلت بيقولك !
ان هذا الامر جزء من ثقافتنا جميعاً و لا اعفى نفسى من ممارسته
و لكن دعونا نبدأ لعلنا ننتهى إلى امر جيد ...
دعونا لا نعتمد على مثل هذا الكلام المرسل
و لا ننساق ورائه الا اذا كان مدلل عليه ...
دعونا ننقل اى خبر دون اضافة او حذف بعد التاكد من صحته ...
دعونا نكون امناء مع انفسنا فربما خبر نقل باستهتار و بتحريف دمر حياة انسان او عائلة بأكملها ...
دعونا نتعلم كلمة لا اعرف اذا كنت بالفعل لا تعرف
فليس هذا عيباً ابداً فلا يوجد انسان يعرف كل شىء !..
[ندعوك للتسجيل في المنتدى أو التعريف بنفسك لمعاينة هذه الصورة]